Nie gańcie se zimiokow

Roztomili Ludkowie powiym wom, że od dobrych pora lot ludziska jedzom coroz myni zimiokow. Jeszcze 30 lot tymu kożdy mioł na łobiod naszkrobane słuszny gorczek zimiokow. A dzisio jak ludzie zjedzom po 2 na gowa to je dobrze.

Czamu tak je? A myśla, że skuli tego, że wtoś puścioł blef, że zimioki yno nas tuczom, a nic nie dowajom i lepszy jeść ryż, krupy, abo same szałoty.

I tu wom powiym ludziska robiom nojwiynkszy błąd. Bo zimioki som pierońsko zdrowe, beztoż też, już chned 300 lot som sadzone na polach i nie jednego od biydy uratowały.

Młode ziomioki majom kupa błonnika i antyoksydantow, beztoż zamiast pilulek proponuja wom jydzcie wiyncyj zimiokow.

Do tego zimioki majom odczynnik zasadowy i odkwaszajom nasze organizmy. A jak jymy dużo miynsa, to organizm je zakwaszony. I zaś zamiast pilulek na odkwaszyni, lepszy uważić zimiokow, posztamfować i dać na talyrz z miynsym.

Zimioki majom też kupa potasu, kiery działo na to jako funguje nasze serce i czy ni momy za dużo wody w organizmie.

Do tego znajdziecie w nich dużo magnezu, wapnia, żelaza i fosforanow. Po mojimu same zdrowi. I co ważne momy w nich witamina C i A, czyli jymy zimioki i momy dobre oczy i odporność.

A do tych co sie durch odchudzajom mom tako nowina, że 100 g zimioka mo yno 80 kalorii, a 100 g ryżu 300 kcal. Beztoż bilans je prosty- wygrywo zimiok.

Roztomili Ludkowie nie gańcie se zimiokow, czyli tego co znomy z dziada, pradziada, bo to je same zdrowi. Zrobcie se kluski, placki abo uwożcie i zjedzcie na sucho z mizeriom.

A jak by tak wom sie nie chciało tych plackow napiyc, to zaproszom do moji restauracje, kaj zimiokow nie brakuje.

Pyrsk.

---

Naszkrobane – naobierane

Chned – parawie

Pilulki – tabletki

Posztamfować – pognieść

Audycja „Rączka gotuje” również w Radiu Vanessa FM od poniedziałku do soboty o 11.45 i 16.45