Ślońsko familijność ?

Hanysy od zawsze uchodziyli za ogromnie gościnnych, serdecznych i familijnych ludzi. Myśla, że durch tak je. Ale starom sie nad jednom rzeczom. Wartki czasy i te całe gibki, podziczałe życi robi to, że zapominomy o naszych stażikach. A przeca na Slońsku, zawsze stary człowiek uznowany boł za strażnica wiedzy i mondrości, boł najważniejszy w familiji.

Powiym wom, że nie umia tego szafnyć, jako to je, że w Polsce cza zbierać na roztomańte rzeczy – choby na „seniorow” –  kierych sie tak piyknie nazywo, ale yno tela. Pora dni tymu była Świonteczno Orkiestra od Owsiaka, fajnacko sprawa, chwała mu za to.

Ale szteruje mie to, że nie szanuje sie teraz ludzi starszych. A przeca kożdy z nos bydzie stary. Tego nie uniknymy i to je ta sprawiedliwość Pon Boczka. Żeby w państwie demokratycznym, kaj nikiedy ludzie przerobiyli po 40 lot, cza było zbierać na lepszejszo starość tych ludzi. Straszne!

Ale jeszcze straszniejsze i bardzi „brutalne” je to, że coroz wiyncy ludzi posyło stażikow do Altesheimu. Przeca kozdy z nos chce być se swojom familiom i w doma se „zawrzyć oczy”. To je chyba najgorszo rzecz, jak cza ze swoji chałupy iś na starość raus.

A godajom, że „starych stromow sie nie przesadzo”. I to je istno prowda.

Kaj tyn Ślońsk, kaj w jednej chałupie mieszkały 3,4 pokolynia do kupy i wszyjscy się zgodzali. Kaj te czasy, jak starki brały na klin bajtle i rozprawiały im godzinami.

We wszystkich kulturach świata, starość to doświadczyni i mondrość. Niech i tak zostanie na Slońsku. Winszuja wom na koniec familijnego fajrowanio i szanujcie se stażikow, bo tyż nimi bydziecie. Pyrsk!

Słowniczek:

Hanysy- Ślązacy
Strom- drzewo
Iś raus- wyprowadzić się
Altesheim- dom starców
„zawrzyć oczy”- umrzeć
Gibki- szybkie