Śląskie Smaki

Witejcie roztomili Ludkowie. Wiycie kupa sie tera godo o naszej gwarze, tradycjach i kulturze, a przede wszyskim o ślońskim kuście. Bo kaj przeca majom tak dobre jodło jak nie u nos na Slońsku. Bezmałaś nasza kuchnia- ślońsko, je nojbardzi rozpoznowanom kuchniom regionalnom. I wcale się tymu nie dziwia. Przeca kluski, rolada i modro kapusta już znajom wszyscy w Polsce i nie yno.

A śloński kust to też roztomańte zupy (wodzionka, parzybroda, żur żyniaty, bioły żur i insze), miynsiwa (jaskółcze gniozdo, żeberka dymfowane, karminadle) no i maszkety (kołocze, szpajzy, kopy, ule). I jak tu się niy jeś takich dobroci?

Ale do mie nojpiykniejszy je to, że kupa się tera robi, keby flyjgować te piykne sloński tradycje kulinarne. Od 7 już lot przeca momy Festiwal Kulinarny Śląskie Smaki kiery organizuje Ślońsko Organizacjo Turystyczno. Tam to se idzie pomaszkecić. Praje tera we sobota boł już VIII Festiwal. Jo to przijechoł pełny jak bąk po furganiu na kwiotkach.

Szło se rychtyk pociamać. A coch też zauważoł- to to, że kuchnia ślońsko idzie połączyć z nowoczesnością. Byście widzieli te dania na tych talyrzach, aż szkoda było tego ruszać i jeś.

Bydzie już mono rok, jak sztartnoł też Szlak Kulinarny Śląski Smaki- som to miejsca w cołkim województwie kaj idzie zjeś echt kuchnia tradycyjno.

Jak sie na to wszysko dziwom to musza wom pedzieć z pełnom świadomościom, że momy prawdziwy renesans naszego ślońskigo kustu i chwała Bogu za to. Przeca to co nasze je nojlepsze, a niy jakiś bibzdy niy wiadomo skond. Niech tradycjo bydzie gorom, a Ślońsk i Hanysy sie nie potracom. Pyrsk!

---

Maszkety – desery, ciasta
Echt – prawdziwa
Kust – kuchnia, jedzenie
Bibzdy – byle co do jedzenia