Afrykański hyc

Ludziom je rychtyk ciynżko wygodzić. Ciepło źle, zima źle. Jak padze chcymy słonko, a jak klara świyci, toż zaś halacymy, że za fest. A jak lato, toż musi być przeca ciepło. Mie tam nigdy ciepłota nie przeszkodzała, ale tak jak łostatnio dowalyło, to już ni ma tak hop siup. 37 stopni w cieniu, no choby we Afryce, yno afow brakuje.

Ale nie starejcie sie, bo z hycami tyż se człowiek umi radzić. Piyrsze co, toż cza w doma zaciongnyć okna, keby tyn ciepły luft niy przechodzioł, a promyczki niy grzoły. Po drugi nojlepszy mieć windylator, kiery troszka choćby nom powachluje tyn chłodny luft.

Ale nojważniejsze, to żeby chłodzić sie od środka. I wcale piwo tukej ni ma dobre na chłodzyni, bo yno człowiek sie bardzi poci. Godajom, żeby pić słodki tyj ze fefermynicom. Bezmałaś dobrze chłodzi, a tyn cukier przi tym hycu mo nom dować krzepy. Zresztom moga tymu przitaknyć, bo jak ech boł we Turcji, toż oni yno taki tyj piyli, a nic ich niy suszyło.

Moj stażik dycki w taki hyca pioł zimno maślonka, abo kiszka. Do tego maszczone zimioki i to boł nojlepszy obiod na świecie, a ku tymu fajnie chłodzioł.

Na hyca pieronym dobry je tyż kompot ze rabarberu, taki pokwaskowaty. Szmakuje rychtyk fajniście.

Ku tymu ważno je tyż psychika. Bo przeca pomyście se, że za chwila bydzie fujać śniyg i uzaś bydymy halatać na pogoda, kiero troszka przedobrzyła.

Pod wiela som żniwa, toż niech klara świyci i niech nie kidze, keby ludzie na spokojnie pozbiyrali z pol, to co zasioli.

A jo wom życza udanych dalszych feryji i dużo ciynia. Pyrsk!

Hyc - upał

afa - małpa

kiszka - kwaśne mleko

halatać - narzekać

klara - słońce