Chned Walentynki

Godo sie, że ludziska na Ślońsku som mało uczuciowi. Żebyście mie źle nie zrozumieli, mało sie godo o przociu se do kupy. Przeca rasowy Hanys je robotny, twardy i nie godo o uczuciach (bez to my dycki przegrywali z Gorolami, kierzi poradzili słodzić- a babom sie to podobo). My Hanysy dużo rzeczy robimy, yno nie trombiymy o tym na prawo i lewo. Tacy my już som.

Ale myśla, że to tyż sie już zmiynio. A ku tymu je terozki okazjo- Walentynki.

I choć prziszło to z Ameryki, coroz bardzi dowomy sie wkryncić w ta fedra ogupiynio, ale podle mie takigo pozytywnego.

Walentynki ciekawe świynto, nazwa wziyna sie od św. Walyntego, kiery przeca patronuje tym kierym pizło na dekiel. Ale bezmałaś naukowcy oszacowali, że miłość to je stan otympiynio. I coś w tym je, bo jak sie na nikierych dziwom, to sie to potwierdzo.

Ale tak miyndzy Bogiym, a prowdom, te świynto dowo nom cosik inszego. To, że mogymy se kajś iś posiedzieć, zjeś coś dobrego, ale przede wszyskim być do kupy. A to chyba w tych podziwoczałych czasach je ważne.

Walentynki, to je dobry dziyń na to, żeby nadrobić zaległości we przociu. Dejcie se w tym dniu Kusku, sztelnicie plac we restauracji i pofajrujcie, bo nastympne Walentynki dziypiyro za rok. Pyrsk!

---

Sztelnonć - zarezerwować
Przoć - kochać
Trombić - ogłaszać
Fedra - spirala
Pizło na dekel - oszaleli