Szacunek do chleba

Żniwa pełnom parom, a jo już sie ciesza na chlyb ze świeżej mąki reżnej kiero bydzie chned. Nojlepszy chlyb je właśnie z takij mąki, a nie roztomańte udziwnione, kiere przeca idzie terozki wszyndy dostać.

Ale chlyb to nie yno jedzyni, ale wielko symbolika. Jo dycki godom, że wszyskigo w doma może braknyć, ale chleba nie śmi. Bo chlyb je symbolym dostatku.

Chleba też nie śmi sie wyciepnyć. Jak zostanie, toż idzie go ususzyć, abo ś niego zrobić wodzionka. A i przeca maszket tyż idzie machnyć- bo armerichter szmakuje fest dobrze.

Jak zaś spadnie toż cza go dycki pokuskować i odłożyć.

Troszka mie szteruje, że ludzie przestali tyn ciynżko zarobiony chlebiczek szanować.

A przeca bez niego nie do sie żyć. Zresztom chlyb to jedyno rzecz kiero nigdy, przenigdy nie je w sztandzie sie człowiekowi obmierznąć.

Z chlebym tyż momy roztomańte zwyczaje. Choby to, że młodo pani jak idzie do ślubu, toż musi mieć w taszce krajiczek chleba, a to wszysko skuli tego, żeby tego chleba nigdy w życiu nie brakło.

Powiym wom yno tela, że bez chleba ani rusz.

Pyrsk

Mąka reżno - mąka żytnia

Armerichter - deser z chleba maczany w mleku

Szteruje - denerwuje

Krajiczek - kromka

Skuli - z powodu