Europejski standardy

Wiycie jak sie siedzi doma, to człowiekowi ciynżko dać pozor, co sie we świecie zmiynio. Bo w doma to yno człowiek halace i nic wiyncyj, jak sie dziwo w te pudło zwane telewizorym. A dobrze sie je, łod czasu do czasu z chałupy wypuścić i obejrzeć jako je kaj indzi.

I jo tyż tak zrobioł. Przeca feryje, to też trza kajś wybznyć z chałupy.

Sztelnoł ech se Pendolino i za 6 godzin, boł ech już nad morzym.

A w tym Pendolino lux na całego. Wygodne fotele, szteker przi kożdym placu, do kierego bele co idzie podłączyć. Kelnerki serwujom kawusia, tyj zielony, czorny i co yno dusza zapragnie. Przeca w cugach je restauracjo zwano Warsym, kaj sie normalnie warzi obiady. Beztoż co se zapragniecie, to mocie. Do tego gazetka i tak idzie rajzować.

A z tym morzym bez zima? Nie jedyn kozoł sie mi piznyć w dekel. Kaj też bez zima nad morze?

Za to jodu nojwiyncyj. Ale nie to, mie haltło i zadziwiyło. Yno to, że łaża w biołych szczewikach cołki tydziyń i nie musiołech jich ani roz myć, bo były rychtyk czyste.

Do tego luft, kierym sie idzie rychtyk sztachnyć. I to właśnie je super bez zima nad morzym.

A do tego momy we Polsce hotele z europejskim standardym, kaj basyn i odnowa biologiczno je normom.

Co tu dużo godać, prziszporować i rajzować. Bo to co użyjecie, je wasze i tego wom żodyn nie weźnie. Pyrsk!

---

tyj - herbata

luft - powietrze

sztelować - rezerwować

szteker - gniazdko

plac - miejsce