Numer: 12 (801)
Data wydania: 22.03.16
Symbolika Palmy wielkanocnej
Felieton Remigiusza Rączki
No i momy już po Niedzieli Palmowej, beztoż zaczli my kwiytni tydziyń. Eźli jeszcze wto nie posioł roztomańtych kwiotkow (cinie, astry, smrodziuszki) to je to nojlepszy czas. Yno dycki nie sieje sie kapusty, bo bezmałaś bydom same wyrostki. Ale za to roztomańto zielynina posioto w tyn czas, bydzie piykno.
Ale wroca sie do palmy. Je żech fest rod, że ludzie coroz myni przilażom do kościoła z tymi „suszkami” ze sklepu, a wracajom sie do tradycji i majom palmy tak jak trza.
A palma mo mieć podle tradycji ślońskij- nojmyni 7 zortow gałązek- kocianki, flider, kokocz, złoty deszcz, wieprzek, grinszpon, deryń i inksze. Do tego palma musi być wiązano 3 razy, skiż tego, że Pon Boczek 3 razy upod, a w wiązaniu mo być 5 ringow, skiż tego, że Pan Jezus mioł 5 ran.
Do tego palmom trza 3 razy po plecach klupnyć, żeby cołki rok nos nie strzikało. We piątek mo sie z gałązek palmy porobić krziżyki i na polach postyrkać w kożdy rog. Mo to chronić uprawy przed gradym, suszom i dać dobre plony. A reszta palmy trza spolić i okadzić tym cołkie domostwo, co mo uchronić przed złym.
Dzisio inakszy żyjymy i taki rzeczy som nom dziwne. Ale tak se myśla, że symbolika je fest ważno, a jak nie bydymy wierzyć w nic, to bydymy jak liście na wietrze. Jak zawieje wiater, tak polecymy. A swoji trza wiedzieć.
Na koniec życza Wom udanych, piyknych świont Wielkij Nocy, no i babeczki mokrego śmiergustu.
śmiergust- lany poniedziałek
kocianki- bazie
flider- bez
wieprzek- agrest
klupnyć- uderzyć
smrodziuszki- aksamitki