Numer: 40 (308)
Data wydania: 02.10.12
Ślońsko godka
Wiycie kupa terozki sie godo wszyndzi ło tej naszej ślońskij godce. Jedni godajom, że to je jynzyk, inksi, że dialekt, a po mojimu to je godka. Ni ma co wydziwiać, yno cza przitaknyć, że tak sie godo tukej, na tyj czornej ziymi, czyli Ślońsku.
Bezmałaś już oberrechtory spisujom kaj jaki słowko i chcom machnonć słownik polsko– śloński, a nieskożi zmienić nazwa gwary na jynzyk.
Wiycie wszystko piyknie by mi pasowało, yno Ślońsk je wielki, a godki roztomańte. I teraz kiero uznać za nojlepszo? Przeca inakszy się godo we Raciborzu, inakszy we Pszczynie czy Cieszynie, a jeszcze blank inakszy w Radzionkowie czy Siymianowicach.
I jako tu godać? Lepsze tuste czy fet, zimioki czy kartofle, a iść do dom czy du dom?
Wedle mie kożdo odmiana godki je dobro i niech kożdy godo jak poradzi i jak sie nauczoł w doma. Jo myśla, że wiynkszy problym je kaj indzi. Ludziska godajom po ślońsku, ale fest ta piykno godka spolszczajom. A bajtle nie poradzom już praje wcale godać, po przeca cza ich uczyć poprawnej polszczyzny. Nie godom niy, ale cza ich też uczyć piyknej ślońskij godki.
Mało kiery bajtel wiy, że żdżadło to lustro, tepichy to chodniki dywanowe, a na śniodani jedzom radistki ze sznytlochym.
Pod wiela nad tym nie zapanujymy, ni ma co sie doktoryzować nad ślońskim jynzykiym.
Czasy momy ciynżkie. Żodyn ni mo czasu, a najgorsze, że ni majom go też ci co som już na pyndzyji. Czamu? A dyć cza być z serialami na bieżąco. A nie lepszy by było wzionć bajtla na klin i mu trocha połosprowiać o utopkach, piyknych ślońskich tradycjach, abo iść s nim do lasa na grziby (prowoki, zajonczoki już na nas czekajom).
Ślońsko godka je tako piykno, beztoż cza jom flyjgować. Ale cza zacznonć łod tych najmłodszych– od bajtli. Bo tak jak godo przisłowi– „czym za młodu nondziesz, tym już na starość zostaniesz”.
Remigiusz Rączka
Słowniczek dlo bajtli:
Radistki - rzodkiewki
Sznytloch - szczypiorek
Flyjgować - pielęgnować
Blank - całkowicie