„Szkubaczki do boju”

Łoto godali my o gynsinie i tym jako je dobro i zdrowo. Ale gynsi to też piyrzi. Dzisio momy kołdry i zegłowki przeważnie sztuczne– godajom ekologiczne. Ale cza rychtyk poształnować, czy to je taki zdrowe i eko? Jeszcze 30 lot tymu kożdy społ pod pierzinom, a potym jakoś zaczli nom tłoc do gowy, że tam som bakteryje, roztocza i insze pieroństwa. A jo se tak myśla, że pod pierzinom spało się nojlepszy i ekologicznie, wcale jak była dobrze wyluftowano izba, a zegłowki, płachty i poszwy były wyszkrobione. To sie ale spało.

Ale żeby była pierzina, cza nojprzod piyrzi poszkubać. Beztoż o tej porze roku, jak wieczory były dłogi, a baby miały wiyncy czasu, toż zaczynały się wyszkubki.

Szkubaczki chodziły szkubać na tzw. wrocka. Przeca żodyn żodnymu nie płacioł, yno chodzili se robota wracać. Wyszkubki to było rychtyk coś. Nikiedy i tydzień baby szkubały, jak piyrzo było moc. Ale musza wom pedzieć, że ludzie wtedy mieli chocioż okazjo sie spotkać, pogodać, a somsiod widzioł somsiada.

Mie też starka brała za bajtla na szkubani. Nojlepszy było pod stołym, kaj leżało pełno szpilow  z piyrzo, ale jeszcze lepsze były te szkubaczki, kiere poradziły cołko wieś łobgodać. Ale chocioż było wesoło.

Nojlepszy na wyszkubkach boł Fyjderbal, wtedy gospodyni sztelowała muzykanta z cyjom i się zaczynoł fajer. Na stole stoła bonkawa, zista, no i cosik mocniejszego na zomb. A nieskożi to już yno były śpiywy i wyski.

Jak tak pomyśla, to tera ludzie som rychtyk „biydni”. Bo kożdy yno przed sia, klapki na oczy, żodyn nie chodzi do żodnego na wysiady, o szkubaniu piyrzo niy wspomna. A przeca to dowało tela szpasu. Coż mi zostało pedzieć– niech wspomniynia stanom sie faktym.

Ludzie chowcie gynsi, szkubejcie i fajrujcie, bo życi yno jedne. Pyrsk!

---

Słowniczek dlo bajtli:

Fajrować – bawić się

Nieskożi – później

Wysiady – spotkania sąsiedzkie

Fyjderbal – impreza na zakończenie wyszkubek

Zista – babka piaskowa

Sztelować – zamawiać

Zegłowek – poduszka

Wyszkrobione – wykrochmalone