"Od Łucyji do Wilijii"

Witejcie Ludkowie! Mieli my jesiyń i wartko latoś momy zima. I to tako konkretno, bo mroz jak kyndroz. Ale nie starejcie sie, bo i chrobactwo wymarznie, kopruchow nie bydzie, a i do nos to je lepszo pogoda. Bo wymrozić sie je dobrze– kichol sie przeszlakuje, a szpacery po mrozie to je istno krioterapia (teraz fest modno i zdrowo). Ludzie dowajom sie zawrzyć do takich specjalnym ańcli z mrozym i jeszcze za to płacom– a nom Pon Bóczek fonduje to za darmo. To by boł czysty grzych nie skorzystać.

Nie wiym czy daliście se pozor, ale wszyscy chcom wiedzieć jako bydzie pogoda.

Kaj yno teraz cykniecie, to pokazujom pogoda, czy wyświyci słońce czy popadze śnieg abo dyszcz, abo wiela piźnie mrozu.

A piyrwej ludzie ni mieli telewizorow, a wiedzieli naprzod jako bydzie pogoda. Bo i je dużo porzekadeł o pogodzie, ale nojbardzi sprawdzo sie „od Lucyji do Wilijii”. 13 grudnia bydzie Łucje i wtedy też cza zacznońć zaglondać na pogoda. Bo jako pogoda na Łucyje taki bydzie styczeń. No i ważno rzecz– dycki rano to je poczontek miesiąca, poszczśrodek dnia– połowica miesiąca, a popołednie – końcowka. I tak cza sie dziwać w niebo aż do wilije, skiż tego, że kożdy dziyń to je nastympny miesionc roku. A jak by tak praje 19 grudnia fujało, to nie myscie se, że w lipniu bydzie tyż fujać, yno, że bydzie lipiyń deszczowy. Piyrwej ludzie dziynki tym prognozom wiedzieli kiedy suszyć siano, abo kludzić żniwa, a jo dzisiej jeżdża na wczasy i dycki mom piykno pogoda.

Roztomili Ludkowie dziwejcie się w niebo, piszcie se to, a rok 2013 wos nie zaskoczy. Pyrsk!

---

Słowniczek dlo bajtli:

• Latoś – w tym roku
• Kopruch – komar
• Przeszlakować – przeczyścić
• Ańcla – małe pomieszczenie
• Piźnie – uderzy
• Naprzod – z góry wiedzieć, wcześniej
• Fujo – pada śnieg
• Kludzić – zwozić, prowadzić