Pogoda barowo

No i momy roztomili Ludkowie listopad. Miesionc kiery mie nie bardzo pasuje- bo i co mo w nim pasować. Cima, zima, gołe stromy i dyszcz abo mokry śniyg. Mój stażik świyntej pamiynci, dycki godoł, że to je pogoda barowo- „siedzieć w szynku i dłog czaskać”.

Cożkej szynki pobankrociyły, bo i obyczaje sie trocha zmiyniyły. Kożdy dzisio se kupi i idzie du dom.

A co w tako pogoda i dłogi wieczory robić? No chyba nie dziwać sie sztyc na te pudło, w kierym puszczajom praje same gupoty.

Baby sie majom lepszy, bo i sztrykowanio sie mogom chycić (bydzie jak znojd geszynk na dzieciątko), abo iść se na wysiady. A nom zostało yno ciupani drzewa we pywnicy.

Ale tak se myśla, że tyn czas je dobry na nadrobiyni inszych zaległości- bardzi duchowych. Bo przeca ni ma to jak nawiydzić kumpli, pograć ś nimi we szkata, zarozki czas wartszy leci.

Mie choć czasu nie nadbywo, ani w taki czas, tyż musza cosik u sia zmiynić. Bo cza poczytać jako ksionżka i wom tyż to proponuja. Przede wszyskim człowiek używo wyobraźni i musi zapamiyntywać- beztoż ci co czytajom ni majom na starość sklerozy. A skleroza to je pieroństwo- człowiek zrobi se kawa i zapomni jom wypić.

Bajtlom tyż polecom czytani- żeby nie siedzieć sztyc przed komputerym i na portalach społecznościowych, na kierych nic mondrego ni ma. Za to ksionżka rozwijo zdolności logicznego myślynio (z czym młodzi terozki majom problym).

Kochani Ludkowie- tyn listopad wcale nie musi być taki zły, jak yno dobrze se go zagospodarujymy. Pyrsk!

---

Szynk – bar piwny

Strom– drzewo

Czaskać – robić

Pobankrociyły – zbankrutowały

Szkat – śląska gra w karty

Ciupani – rozdrabnianie drzewa