Miyndzynarodowy kartofelsalat

Witejcie Ludkowie. Dzisio mom do wos tymat iście kulinarny, skuli czego je mi fest miło. A idzie mi ło kartofelsalat. Kiery go przeca niy zno? Chyba na Ślońsku ni ma takigo człowieka, no chyba, ze jakiś dziwok, kiery kustuje sie yno z tytek abo z biksy.

We marcu przeca żeście głosowali na „Smaki Pogranicza Morawskich Wrót” i wygroł kartofelsalat. I wcale mi to ni ma dziwne.

Przeca nie było downij gościny bez karofelsalatu. Boł łon rychtowany na Geburstagi, komonije, weseliska, no i stypy. Zresztom jak dobrze pamiyntom, mama dycki roz na miesiąc, też we niedziela kartofelsalat robiyła. A zestaw do niego boł zawsze taki som: pieczone kitko z kurczaka z prodiża, świński kotlet, ewytualnie grzote francki.

Kartofelsalat moga uznać za prawdziwo ślońsko klasyka. Zresztom zostoł wpisany na lista produktow regionalnych i chwała za to. Bo je to nasze dziedzictwo, kiere muszymy flyjgować.

Ale kartofelsalat łączy tyż narody. Bo przeca robiymy go my, znajom go Czesi, a uwielbiajom Niymcy. Co tu dużo godać, dziynki kartofelsalatowi dogodomy sie kulinarnie wszyndzi. Zresztom ś nim je jak z naszom ślońskom godkom. Dogodosz sie i w Niemcach i w Czechach bez problemu.

Roztomili Ludkowie, co tu dużo godać, pospominejcie se smaki młodości i zrobcie taki łobiod z kartofelsalatym. Bydziecie mieć kupa uciechy. Pyrsk!

---

Kartofelsalat – sałatka ziemniaczana

Biksa – puszka

Tytka – torebka

Kitko – udko