Ku pamiynci utopka

Powiym wom, że czasy zaiwaniajom pierońsko wartko, a my zapominomy o roztomańtych rzeczach, kiere jeszcze wcale nie tak downo były na porzondku dziennym.

Dokładnie to mi dzisio idzie o utopka. Kiery bajtel poradzi cosik pedzieć o utopku?

Zawładnyły dzisio światym bajtli świnki peppy, hello kitty i inksze bohatyry z tych nowoczesnych bojek.A kaj miejsce na utopka?

Na berach ło nim żech przeca boł wychowany. Starka dycki mie brała na klin i mi łosprowiała o utopcach. Bez to ku stawie, abo sztrece nigdy mie nie ciągło, boch sie boł jak pieron.

A o utopkach godało sie roztomańte bery, że som to zielone ludki, siedzom dycki we wodzie i jak yno umiom to ciągnom wszystkich ku nij. A nojbardzi to dycki musiały dać pozor młode frelki, bo utopki rade jich wołać i topić.

Stażi ludzie godali, że utopki tyż nikandzi dowały dobre rady, bezto, jak mioł kiery problym, szoł pogodać ze utopkiym. Yno musioł dać pierońsko pozor, żeby go nie wciongnoł do wody.

Roztomili Ludkowie, zrobcie se rymamynt we gowie i połosprowiejcie bajtlom o naszych utopkach, bo jak wy tego niy zrobicie, to bydzie amyn i wszysko pudzie w zapomniyni. Pyrsk!

---

utopek – utopiec

bery – opowieści

bojki – bajki

frelka – młoda dziewczyna

sztreka – rzeczka