Noworoczne postanowiynia

No i momy uzaś Nowy Rok już 2015, beztoż chciołech wom powinszować szczynścio, zdrowio, błogosławiyństwa Bożego, keby wom sie yno mnożyło, a nie traciyło.

Ale z Nowym Rokiym dycki momy jakiś postanowiynia- przeważnie kożdy obiecuje se, że musi ściepać troszka sadełka. Przeca moczka, makowki i inksze świonteczne maszkety, to je czysty tucz. A wiadomo po świyntach, jeszcze tak dłogich jak latoś- kożdy człowiek je ze 2-3 kilo do przodku. I co tu zrobić?

Jedni sie łodchudzajom na całego, ale to ni ma tak łaps. Bo na poczontek chudnymy fest (abo nom sie tak zdo) skiż tego, że traci sie woda. Ale organizm yno czeko, kiedy pynknymy i zjymy se krepla, a wtedy jo-jo momy pewne. I co tu robić? Nie odchudzać sie?

Jo by padoł, że nojlepszy to tak pożynić do kupy, myni jodła i wiyncyj ruchu. Dobrze robi basyn, koło, szpacery.

A czy wszysko mogymy jeść? Nojważniejsze, żeby na wieczor nie jeść za dużo owocow (a nojlepszy wcale po sztwortej popołedniu), dać se szlus ze maszketami, a na łobiod delikatnie ograniczyć maśniny (kotlety, karczki, żeberka, kaczki, gynsi).

To ni ma wcale taki proste, jak szmak je pieroński na wszystko, ale pomału jak człowiek bydzie sie ograniczać, to też efekty bydzie widać.

I to wcale nie idzie ło to, czy my som bardzi okrągli czy ni, yno ło to, czy som my wyzgierniejsi, nie zafuczymy sie pod kympka. Po mojimu czy som my zdrowsi?

I tego wom życza w tym Nowym Roku- zdrowio bez kierego ani rusz. Pyrsk

Maszkety – ciasta

Dać se szlus – zrezygnować

Latoś – tego roku

Koło – rower

Krepel – pączek